Siste blogginnlegg:

Stilling ledig - Nettserier på Raptus

av Olaf Moriarty Solstrand, 16.06.2009, 10:33

Eg kjem meg sannsynlegvis ikkje på Raptus i år. Men det betyr ikkje at eg ikkje har lyst til at Nettserier skal vera til stades på festivalen. Difor utlyser eg herved

to ledige stillingar: standgeneralar Raptus 2009

Nettserier har bestilt stand på Raptus i år, og eg trenger nokon til å drive/passe standen. Eg har i utgangspunktet ikkje moglegheit til å dekke reiseutgifter for folk, difor søker eg etter to personar som i utgangspunktet har tenkt seg på Raptus uansett, som kan dele tida på standen mellom seg slik at ein ikkje treng å gå glipp av heile festivalen. Som i fjor har Nettserier ingen produkter å selge, føremålet med standen er å skape blest om Nettserier, og å sørge for at alle Nettserier-brukarar som er interesserte i det får ei moglegheit til å sitja på standen og teikna litt.

Som standgeneral er du Nettseriers ansikt utad på Raptus. Eg er difor interessert i folk som har ei brennande interesse for Nettserier og som ønskjer å dele denne med folk på Raptus. Søkarane må vera over 18 år.

Arbeidsoppgåver vil vera:

- Å befinne seg på eller nær standen 50 % av festivalens opningstid (her forventer eg at dei to som får jobben klarer å dele festivalen nokonlunde likt mellom seg), iallfall fram til sundag klokka tre eller noko sånt

- Å sørge for at Nettserier-folk som kjem innom standen og er interesserte i å sitja der ei stund (eg har bestilt *seks* stolar i år) får moglegheita til det, evt. setja opp ei rulleringsliste dersom det blir nødvendig

- Å dele ut Nettserier-flyers

- Å opplyse nysgjerrige som eventuelt spør om kva Nettserier er for noko

- Å dokumentere festivalen og særleg Nettserier-delen av festivalen fotografisk

- Å halde kontakten med Raptus-leiinga på Nettseriers vegne når det er behov for det (mellom anna kjem dei sannsynlegvis til å kome innom standen med ein faktura i løpet av helga, som nokon må ta imot og sende vidare til meg)

- Å organisere den årlege Nettserier-pizzafesten fredag kveld

- Flyers og anna promomateriale vil bli sendt i posten herfrå, så dersom ein av dei to som får jobben anten bur i Bergen eller reiser til festivalen med bil, er det supert om denne stiller opp som mottakaradresse -- elles må slikt materiale hentast på eit postkontor i Bergen på fredag

- Sende ting i posten tilbake til meg når festivalen er over

Tilsetjingsforholdet er midlertidig og opphøyrer når Raptus er over.

Lønn:
Kvar person får 1000 skattefrie kroner for heile helga. Ikkje veldig mykje pengar, men så lenge det er under 1000 kroner blir det i det minste skattefritt. Forskotsutbetaling kan avtalast om ønskjeleg.

I tillegg vil du få eit par Nettserier-T-skjorter (som eg blir veldig glad om du bruker på standen, men du skal få slippe å sende den skitne skjorta tilbake til meg etter det), og gratis inngong på heile festivalen (sannsynlegvis er det eit par interessante programpostar i den tida du ikkje trenger å tilbringe på standen). Eg spanderer òg din porsjon av pizzaspleisefesten på fredag (med drikke).

Eg har diverre som sagt *ikkje* moglegheit til å dekke reiseutgifter. Dersom du er den klart beste søkaren for stillinga med soleklar margin og du ikkje har moglegheit til å stille opp utan å få reise dekt, send ein søknad og nevn dette, så skal eg sjå kva eg får til.

Send din søknad til olaf@olafsolstrand.no innen 15. juli.

6 kommentarar

Gå til Pacham-bloggen